Ou vide san
Ou souse san
Ou bwè san
Ou manje boul san
Ou fè dlo kouri nan je nou tankou de rann san
Ou mande n pou n aksepte gade san nou ki ap koule
San frè n ak sè n ki ap gaspiye tankou kochon y ap tiye
San jenès la ki bouke
San jèn fi y ap fè rive jouk nan emowaji anba vyòl delenkan malsite
San entelektyèl onèt ak konsekan y ap gaspiye
San jij ak avoka ki konpetan epi ki pa tchoul y ap sakrifiye
Ou fè Konstisyon peyi a tounen papye twalèt
Ou fè plim kèk entelektyèl tounen bayonèt
Ou fè tout sitwayen yo ki aletranje pa kab dòmi devan malè sa a ki pandye sou tèt
Ou fè menm zwazo ale kouri kache nan nich yo : yo pa vle chante, bagay yo twò lèd, lèd nèt
Ou fè solèy la klere tou nwa, san li pa ka sòti ak payèt
Ou fè lalin nan rete kache dèyè nwaj yo paske li di Abrahamdisètase
Ou fè lanmè a gade tout salte andedan l, epi remanje malpwòpte paske nan zile a gen twòp salte
Ou fè yon pèp ap respire laperèz, danse ak lanmò l anbabwa l, pèdi sa li te rete kòm diyite
Ou fè yon dat istorik tounen yon wont nasyonal : nou ap gade kouman diktati retounen tèt kale
Ou pa wè ni douvan ni dèyè
Ou pa konn konte ni mwa, ni lane, sèlman ou konn konte gwo biyè
Agiman ou tèt anba, yo sanble ak gwo kout zèklè
Ou pa tande, ou pa wè
Ou avèg, ou soud, ou bèbè
Lè ou ap pale, ou tankou lamayòt ki vle fè moun pè
Jouk kilè minòt sa a ap lage nou?
Kòd sal sa a ap sòti nan kou nou ?
Baboukèt sa a ap sòti nan bouch nou ?
Dan sa a ak grif sa a ap sòti nan kou nou ?
Pawòt dwat e gòch sa yo ap sispann fè kenken nan zòrèy nou ?
San nou ap sispann koule nan labou?
Ti zile sa a ap jwenn yon ti souf, epi lapè ap tounen nan lakou ?
Jouk kilè ? Fout tonnè.
Jouk kilè ? Tonnè.
Jouk kilè ?
Wooldy Edson Louidor, 7 fevriye 2021
Crédito Foto: CLACSO
Enlace: https://www.clacso.org/comunicado-ante-la-situacion-de-haiti/